مش دايمًا الأمان بيبقى إنسان

 مش دايمًا الأمان بيبقى إنسان…

بقلم/ وجدان اغا

ومش شرط عشان انتي وحيدة تبقي ضعيفة ومكسورة … في ناس ربنا ما كتبش الأمان في حياتها في صورة بني آدم ، لا اب ، لا اخ ، لا زوج ، لا خال او عم ولا اي كتف تتسند عليه ….

 يمكن عشان لو اتعلّقت كانت هتتوجع.… فربنا اختار يكون هو الأمان.…

زي ستنا مريم ، كانت لوحدها، قلبها محروق على ابنها ، وناس كتير مستنية ليها غلطة ، بس ربنا كان معاها خطوة بخطوة… يطمنها، ويقويها، ويحاوطها برحمته  وكرمه .…

وزي السيدة هاجر، ست لوحدها في صحراء ، لا اكل ولا ميّة ولا سند، بس لما قالت: " حسبنا الله "…الأمان نزل من السما… وطلع بئر زمزم من تحت رجل ابنها.… طمنها وطبطب علي قلبها … 

فلو إنتِ وحيدة ، ومش لاقية حد جنبك تحسي معاه بالأمان ، افتكري إن ربنا مش بيكسّر بخاطر حد. … يمكن الأمان اللي نفسك فيه دا مش شخص… يمكن دعوة مستجابة ، أو طمأنينة بتزل في قلبك فجأة ، أو قوة جواكي ما كنتيش عارفاها.…

وساعتها هتعرفي… إن ربنا لما يشيل حد عنده ، ما بيسيبهوش أبدًا.…

وساعتها بقى اسألي نفسك… هو انتي وحيدة؟ ولا ربنا بس قرر يكون هو الأمان لوحده؟

ربنا ما بيسيبش حد من غير أمان ، بس أوقات الأمان ما بيبقاش شخص…

دا بيبقى ربنا نفسه سبحانه وتعالى .… اطمني… طول ما ربنا معاكي، الجاي أحلى حتى لو مش باين دلوقتي …

يمكن الطريق هادي، بس نهايته دايمًا أمان وراحة قلب.…اللي ربنا شايله بإيده ، عمره ما يقع …

ابتسمي… ربنا مش بيأخر، هو بس بيرتب … يمكن انتي لوحدك دلوقتي، بس بكرة هتعرفي إن ده كان أقوى وقت في حياتك.…

خلي قلبك مطمّن ، ربنا دايمًا بييجي في الوقت الصح …